İndi hər millət gedir şeytan olan ünvan tərəf,
İblisin səmti əyandır ki, olub viran tərəf.
Bir çoxu üryan gəzir heç kimsədən ar eyləmir,
Amma ki, üryan gəzəndən ar edir üryan tərəf.
Qız tərəf toy istəyəndə borca girdi oğlumuz,
İndi də ev istəyir, rüsvay olub oğlan tərəf.
Vaxt var idi sızlayardı, qəlb Qarabağım üçün,
İndi ondan bəhs edilmir sızlamır vicdan tərəf.
Bir şeyi dərk etmirəm məğlub olan kimdir görən?
Həm Azərbaycan kef edir, həm də ki, düşman tərəf.
Meydana sahib çıxmayıb biz onu qoyduq yetim,
Heç azadlığdan əsər yox inciyib meydan tərəf.
Özgədən üsyanı umma gəl özünnən umginan,
Zalımı dəstəkləyir çün Abşeron-Şirvan tərəf.
Sən yaman "Haqq-Haqq" deyirsən ey Həbib bir gün gələr,
Görsənər ömrün deşiyindən sənə zindan tərəf.
24 May 2004, Berlin.
